Ղարաբաղա-ադրբեջանական շփման գծում ադրբեջանական զինուժի` երեկ իրականացրած դիվերսիոն հարձակման հետևանքով զոհված կրտսեր սերժանտ Արմեն Հովհաննիսյանի հոգեհանգստի արարողությունն այսօր սկսվեց մոմավառությամբ: Մի խումբ քաղաքացիներ տան մուտքի մոտ շարունակ մոմեր էին վառում՝ ի հիշատակ զոհված զինվորի:
Ներսում զոհված զինվորի հարազատներն էին, ընկերները, Հայոց բանակի բարձրաստիճան սպաներ: Իսկ «Ամբողջ Հայաստանն է սգում, իմ հերո′ս տղա» արտահայտությունը պարբերաբար լսվում էր ներսից:
Այնտեղ էր նաև Արմենի զինակից ընկերը, ով դեպքից առաջ նրա հետ էր: Լրագրողներին մի քանի անգամ պատմեց ընկերոջ հետ իր վերջին հանդիպումը, հետո ավելացրեց. «Քա′ջ տղա էր, ամեն ինչ իր ուսերին վերցնող, ուժեղ…»:
Զոհված զինվորի մասին իրենց կարծիքներն ասացին նաև դպրոցի տնօրենը, զորամասի հրամանատարը. «Պատրաստված զինվոր, կարգապահ աշակերտ, օրինակելի զավակ…»:
Հրամանատարի փոխանցմամբ՝ ԼՂՀ Նախագահի հրամանով Արմեն Հովհաննիսյանը հետմահու պարգևատրվել է արիության մեդալով:
Հիշեցնենք, որ ղարաբաղա-ադրբեջանական զորքերի շփման գծի հյուսիսարևելյան (Ջրաբերդ) և հարավարևելյան (Կորգան) ուղղություններով հունվարի 19-ի լույս 20-ի գիշերը՝ ժամը 23:50-ից մինչև 00:15-ի սահմաններում, արձանագրվել էին ադրբեջանական կողմի դիվերսիոն խմբերի ներթափանցման միաժամանակյա փորձեր։
ԱՂբյուրը-tert.am